呢個10月我會銘記在心的!
我終於體驗到股災啦^^
原來股災真係會好驚架!
原來逆向行為,真係好難做到的!
今個月,我又一次險勝!咁樣只印證一樣野,投資係管理風險!
但呢樣野,係要透過努力學習先會有的!
回想呢一個月,最後個9日,負面消息四圍都係,跌到11000點時,仲諗緊,會跌破10000點!我諗唔少人在果個時候被震走啦!
我只能安慰自己,保持冷靜,各國政府先要驚,佢地已經不停工作,雖不能立刻改變一切,但至少會延遲跌勢!佢地壓力比我更大!佢地帳面比我損失更多:P
雖然有呢一個信念,但都係驚架!明明仲係咁跌!我又唔係政府,唔可以印銀紙:P
不經不覺,已經搏鬥左10個月....
我以前會好妒忌或者叫羨慕股海中賺取大額金錢既人!
其實佢地係應該要賺到大錢的!一來勤力,24小時留意住市況,諗定後著;二來,驚濤駭浪下,茶飯不思,食慾不振,夜夜思考,晚晚失眠,攞番少少補償都好應該既!
就睇左好多投資成功既人既故事,話自己在股災幾咁神勇,所以之後致富成功!跟住總會補充一句,不過曾經破產!呢一句通常都唔會引人注意!
睇落簡單,真金白銀投放下去,又是另一番滋味!真係會卻步的!
經過呢10個月,更清楚,做人真係要百分百耐心(耐心可以得到一個有利的價位)及百分百勤力思考正面的事(拼棄阻礙前進的思維,只諗如何爭取勝利)及百分百控制風險(萬一時不與我,亦可東山再起)!
